Қант диабеті – бұл қандағы қанттың (глюкозаның) жоғары болуынан туындайтын созылмалы эндокриндік ауыру. Глюкоза - біздің ағзамыз үшін негізгі энергия көзі. Оны қаннан шығару процесіне және бұлшық ет тініне сіңуіне ұйқы безінде өндірілетін инсулин гормоны әсер етеді. Егер ұйқы безі инсулинді жеткіліксіз мөлшерде бөлсе немесе организм өндірілетін инсулинді тиімді пайдалана алмаған болса бұл қандағы глюкоза деңгейінің артуына - гипергликемияға әкеледі. Эндокринолог дәрігер Мақпал Жүзенова сырқаттың бұл түрі жайлы төмендегідей ақпарат берді:
-Бұл ауру организмнің көптеген жүйелерінің, оның ішінде бүйректердің де елеулі зақымдануына әкеледі. Диабеттік нефропатия - қант диабетінің ең ауыр асқынған түрі. Артық глюкоза бүйрек тамырларын зақымдайды, олар біртіндеп склерозға ұшырайды. Бүйректер ағзаны улы заттардан тазарту, артериялық қысымды реттеу қызметін қалыпты атқара алмай қалағандықтан бүйрек жетіспеушілігі дамиды. Диабеттік нефропатияны эндокринолог және нефролог дәрігерлер емдейді. Емнің негізгі мақсаты - нефропатияның өршуін баяулату, миокард инфарктісінің, инсульттың, бүйректің ауыр жеткіліксіздігінің даму қаупін төмендету.
-Емдеуде дәрілік және дәрілік емес әдістер қолданылады. Диабетті емдеу барысында тәттілерден (бал, кәмпиттер, газдалған сулар), майлы, қуырылған, ысталған тағамдардан бас тартқан жөн. Нефропатия сатысына қарамастан пациенттерге арнайы тұзсыз, аз ақуызды диета тағайындалады, жануарлардың майын қолдануға шектеу қойылады. Сондай-ақ дене жаттығуларымен тұрақты айналысу қант деңгейін төмендетуге, қан қысымын бақылауға, салмақты қалыпқа келтіруге көмектеседі. Темекі шегуден және алкогольды ішімдіктерді ішуден бас тарту қажет-дейді эндокринолог Мақпал Әділқызы.
Диабеттік нефропатияның соңғы сатыларында пациентке гемодиализ тағайындалуы мүмкін. Кей жағдайда донорлық бүйрек салу немесе тұрақты перитонеалдық диализге бару жағдайы да қарастырылады.
