Қазіргі заманғы отбасылардағы күрделі мәселелердің бірі- бала сүйе алмау. Статистика бойынша әлемде бедеулік репродуктивті жастағы жұптардың 8-12% -ында кездеседі. Бедеулiктiң баласыз жұптардың, әсiресе әйелдердiң өмiрi үшiн әлеуметтiк салдары бар. Кей кезде ол зорлық-зомбылыққа, ажырасуға, әлеуметтiк стигматизацияға , эмоционалдық күйзелiске және өзiн-өзi төмен бағалауға әкеліп соғады. Бұл жайлы мамандырылған медициналық көмек бөлімшесінің акушер-гинеколог дәрігері Гузалья Рафиковна Юзеева мынандай ақпарат береді:
Әйел бедеулігінің себептері эндокриндік бұзылулар, жатыр мен жатыр түтіктерінің патологиялары, иммунологиялық қиындықтар сияқты әртүрлі мәселелер болуы мүмкін. Сондай-ақ отбасылық жұпқа әсер ететін, бедеуліктің дамуына әкелетін сыртқы факторлар бар. Қолайсыз экологиялық аймақтарда өмір сүру, өндірістің зиянды әсері - радиациялық сәулелену, химиялық заттардың болуы, жағымсыз әдеттер: жыныстық жолмен берілетін инфекциялар, темекі шегу, алкогольді көп пайдалану немесе есірткі заттарына әуестену, семіздік. Сондай-ақ ішкі ағзалардың ауырулары - қант диабеті, гипертониялық ауру, созылмалы вирустық гепатиттер, хромосомдық бұзылулар.
Жұпта бедеуліктің себептеріне қарамастан, акушер-гинекологтар, уролог-андрологтар және репродуктологтар салауатты өмір салтының жалпы ережелерін ұстануға кеңес береді. Олар зиянды әдеттерден бас тарту қажет. Дұрыс тамақтанып, тәулігіне 2 литр сұйықтық ішу, көкөністер, жеміс-жидектер, теңіз балығы, ақуыздарды қолданып, кемінде 8 сағат ұйықтау. Осындай қарапайым ережелерді сақтау иммунитетті күшейтеді және ағзаның жағдайын жақсартады. Дегенмен де мамандар бедеулік диагнозы қойылған сәттен бастап, уақыт оздырмай дәрігерлерге қаралған дұрыс деген кеңес айтады.
