«Өткен жолы көмектесті, демек бұл жолы да көмектеседі». Емдеудегі ең жиі кездесетін қателіктердің бірі дәл осылай басталады.
Антибиотиктер тек бактерияларға қарсы әсер етеді. Ал тұмау, суық тию және жедел респираторлық вирустық инфекциялардың (ЖРВИ) көпшілігін вирустар қоздырады, оларға антибиотиктердің әсері болмайды.
Өз бетінше емделудің қандай қаупі бар?
- Антибиотик ауруды қоздырған нақты бактерияға әсер етпеуі мүмкін.
- Дозаны дұрыс сақтамау немесе емдеу курсын мерзімінен бұрын тоқтату бактериялардың тірі қалып, антибиотиктерге төзімді болуына әкеледі.
- Аллергиялық реакциялар, ішектің, бауырдың және басқа да ағзалардың жұмысының бұзылуы сияқты жанама әсерлер туындауы мүмкін.
- Адам сәйкес келмейтін препаратпен емделіп жүргенде, ауру асқынып, бағалы уақыт жоғалуы ықтимал.
Есте сақтаңыз: антибиотикті тек дәрігер тексеруден кейін, ал кейбір жағдайларда қосымша зерттеулердің нәтижесіне сүйене отырып тағайындайды. Сонымен қатар, препаратты белгіленген сызба бойынша қатаң қабылдап, өзіңізді жақсы сезінсеңіз де емдеу курсын мерзімінен бұрын тоқтатпау өте маңызды.
Денсаулығыңызды күтіңіз. Кейде ең дұрыс таблетка – қабылдаудың қажеті жоқ таблетка.
